شارم: الدولة ما عندهاش باش ترسّم الأساتيذة، لكن عندها فلوس باش تجيب ميسي

الرباط اليوم

القوات الجوية المسلحة المغربية غا تشري من عند ميريكان 25 طائرة F16 V الشبح المطورة حديثا، بقيمة 3.7 مليار دولار، (تقريبا 4000 مليار سنتيم مغربية).

هاد الصفقة تشمل كذلك تحديث الطائرات F16 اللي عند المغريب حاليا، و 40 قنبلة ذكية اللي كتكون راكبة فيها، و 40 كاسك متطور اللي كيدير البيلوط فراسو، و مُعدات متطورة للكشف عبر ال gps و دورات تكوينية للضباط المغاربة اللي غا يسوكو هاد لعجب باش ما يطيحهاش ليهم شي حد عاوتاني.

الحكومة الأمريكية قالت بأن هاد الصفقة ما غا تأثرش على توازن القوى الإقليمي، و بأنها هي و روسيا متافقين أنهم يبيعو للكوانب فالمغرب العربي السلاح بالتساوي بشرط ما يضربوش بيه بعضياتهوم للحفاظ على الهدوء فهاد المنطقة الإستراتيجية فالعالام.

و يبقاو فقط مركّزين على محاربة الإرهاب و يمشيو ينوبو علينا للقيام بهاد المهمة بسلاحنا حنا اللي بعناه ليهم بفلوسهوم هوما.

الدولة ما عندهاش باش ترسّم الأساتيذة و باش تخدّم ألاف المعطلين، لكن عندها فلوس باش تشري السلاح و باش تجيب ميسي يلعب فطنجة.

هشام شارم