اخت القاتل هي السبب الرئيسي في وفاة البرلماني مرداس

                           
الرباط اليوم: هشام شارم
ها علاش عندنا أوعر جهاز مخابرات فالعالام، شي حاضي شي، فأقل من ستة د سوايع، تشدّ الفاعل و تعرفات القصة من طق طق للسلامو عليكم.
اللّي كان راكب البارح فالداسيا لكحلة و تيرا فالنائب البرلماني عبد اللطيف مرداس ثلاثة دالقرطاسات جوج فوجهو و وحدة فصدرو هو مصطفى خنجر إبن محمد خنجر العدو اللذوذ ديالو الشهير بإسم برحال.
السبب هو أن النائب المقتول كان على علاقة غرامية بأخت القاتل اللي هي بنت محمد خنجر العدو ديالو، هاد القضية ما تسرطاتش ليهم و مشاو قبل أشهر تعداو عليه و فرشخو ليه الأودي ديالو حيت إتهموه بأنه سىرّب تصاور عريانين ديال ختهوم و ورّاهوم للبراني.
عبد اللطيف مرداس تنازل ليهم على الدعوة و صايب طوموبيلتو من جيبو حيت كان باغي المعقول مع ختهوم اللي عندها 27 عام.
والو، ما بغاوهش يدور بختهوم و بقاو محلّفين عليه، خصوصا ان القتيل و اب القاتل كان بناتهوم حساب قديم و عداوة من لي كانو خدامين بجوج فالثمانينات عند أحد أثرياء منطقة بن حمد.
النائب البرلماني عبد اللطيف مرداس كان شيفور عند هاد السيد الثري.
البارح كان هو نهاية هاد الفيلم، مشا مصطفى خنجر هزّ السناح ديالو و عمّر البارود و تسنّى لامارة تجيه من قايد السربة، جاتو لامارة، تبورد على عبد اللطيف مرداس و رجع لخيمتهوم، و سالات الحفلة.