هذا هو السبب الرئيسي الذي جعل الملك يعفي بنكيران

الرباط اليرم: هشام شارن 

عيّنو المليك محمد الساديس نهار 29 نونبر 2011 رئيس للحكومة المغربية، نقولو حنا بدا خدمتو تال نهار واحد دجنبر 2011.

بقا خدّام فداك المنصب بدون إنقطاع حتّا ل 15 مارس 2017، نقولو حنا أسيدي حتا لثلاثين مارس 2017.

إذن عبد الإله بن كيران خدم بالضبط خمس سنين و ربع شهور، يعني 64 شهر بالتمام و الكمال.

كان كيتخلّص سبعة دلمليون و نص شهريا، هيّا 487 مليون سنتيم و نصّ.

كان كياخد جوج دلمليون تعويض سكن شهريّا، هي 128 مليون سنتيم.

كان كياخد خمسالاف درهم تعويض التجهيز المنزلي و الأواني شهريا، هي 32 مليون سنتيم.

كان كياخد مليون و ثمانين ألف ريال تعويض تمثيل الدولة شهريا، هي 89 مليون و ميّة و عشرين ألف ريال.

كان كياخد 90 ألف ريال يوميا فكل سفرية خارج المغريب، للأسف ما عارفش شحال من مرّة سافر خارج أرض الوطن، لكن نديرو حنا غير ثلاثة دالمرات فالشهر، هي مليون و سبعين ألف ريال شهريا، هي 86 مليون و ثمانين ألف ريال فخمس سنين و ربع شهور.

كان خدا جوج دلمليون سنتيم مع الدخلة كتعويض تنصيبو رئيس للحكومة.

كانت عندو ثلاثة دالسيارات مرسديس كلاس بالشيفورات ديالها مع بون بنزين مفتوح يمشي فين ما بغا.

دابا غا يبقا ليه تقاعد صافي ديال خمسة دلمليون سنتيم قلّ ربعين ألف ريال، غا يبقا يشدّو مدى الحياة.

إذن أسيدي، حصيلة السيد عبد الإله بن كيران فالولاية ديالو كانت بالضبط هي 823 مليون سنتيم، زيد عليهم الڤيلا الفاخرة فطريق زعير اللي عطاها ليه المليك و ندم.

عبد الإله بن كيران عندو جوج مطبعات و جوج مدارس خاصة كيقراو فيها غير ولاد أنا و أنا ، و كيخلّيو ليه حسب تقديرات صحفية تقريبا مية مليون سنتيم شهريا.

السي عبد الإله بن كيران، نجح فالإنتخابات السابقة كنائب برلماني عن سلا، يعني هاهو صالير أخور ديال ربعين ألف درهم غا يبقا يدخل شهريا.

السي عبد الإله بن كيران خدّم ولادو بجوج فأحسن بوسط فالدولة غير بالتلفون.

عن أي حصيلة حكومية هزيلة تتحدّثون ؟ 

بن كيران قدّم ولاية حكومية ناجحة بكل المقاييس.