مظاهر الشغب، الاضرابات، التعنيف.. شنو هو السبب ديال هادشي؟

الرباط اليوم: إكرام الزيزاوي

للأسف ولينا نشوفو بزاف هاد مظاهر الشغب، الاضرابات، التعنيف.. و غيرها فبلادنا، جميع مظاهر العنف و التعنيف النفسي كتر من الجسدي، فجميع المجالات ديال الحياة، لا السياسة ولا التعليم ولا الرياضة ولا… هنا كيجي السؤال، شنو هو السبب ديال هادشي؟! واش هو التربية؟! واش هو الحقوق ديال الإنسان المغتصبة لي ولينا نعيشوها؟! واش هو الفساد؟! واش.. واش… الى جينا نشوفو كولشي هادشي مترابط.

ولينا فزمن الى بغيت تمشي تفرج غي ماتش ديال الكورة بحال الى غادي تحارب بحال الى غادي تجاهد، كيولي عندك شك واش غادي تولي ولا متوليش؟! وهانتا وليت واش غادي تولي بصحتك ولا تجيب معاك شي عاهة ولا اعاقة؟! ولينا فزمن تسول الانسان شنو هو الحلم ديالك اgوليك بغيت دار و خدمة و نعيش فأمان، بينما حنا حياتنا كولها و حنا نقراو بلي هادو حقوق ماشي أحلام! ولينا فزمن قرى حتى تشبع الى مكانش باك صاحبى منخدمكش. ولينا فزمن نخدموك تلت سنين أ قلب فين تخدم.

ولينا فزمن مسوس ممفهومش. كيفاش بغينا هادشي يتصلح وحنا معطيينو حتى أهمية؟! علاش تنوض مظاهرة فترة من الزمن و تحبس؟! سواء بالتعنيف سواء بالتهديد!! علاش مين انوض المواطن اهضر على حقوقو فيساع اسكتوه؟! و علاش نتا يا المواطن تسكت و تبقى ترد العيب فالبلاد؟! علاش كنعطيو أهمية لجيبولو خديجة ولا ينتاحر، ولا لسيمو و ريبيكا، ولا لحنان ولا لإيهاب، ولا لفلان تزوج و فلان دار مشروع تربية الدجاج و فلانة و فلان …. كتر ما كنعطيو أهمية لمشاكل الشعب؟! هادوك الناس لي فالجبال، هادوك الناس لي بايتين فالزنقة، هادوك الناس لي قهراتهوم البطالة هادوك الناس …. و هادوك الناس… لفوقاش غادي نبقاو هكدا؟! فوقاش غادي يآمن الانسان بلي خاصو اصلح نفسو قبل مايحاول اصلح غيرو؟! فوقاش غادي الانسان ابدي ابدل طريقة التفكير ديالو؟! فوقاش غادي ابدي الإصلاح و الجهاد الأكبر لي هضر عليه محمد الخمس رحمه الله مين gال “عدنا من الجهاد الأصغر إلى الجهاد الأكبر”؟! فوقاش غادي نبديو نتعلمو شويا من الدول المتقدمة طرق فتطوير لبلاد و الذات و التفكير، ماشي طرق اللبس و التمشيا و التحسينة؟؟!!

فوقاش؟! …