RABATTODAYتساؤلات اليوم
شنو راحنا نديرو وعلاش راحنا نديروه..؟ أسئلة تطرح كل يوم
الرباط اليوم: إكرام الزيزاوي
يا عجب! ناخدو شوية من الوقت الثمين ديالنا لي كنستاغلوه فوالو ونطرحو سؤال على نفوسنا “شنو راحنا نديرو وعلاش راحنا نديروه أ فاش غدي ينفعنا هدشي لي حنا كنديروه؟…”
هنا كين لي يقدر اجاوب على السؤال الأول ولكن السؤال الثاني اكتير فينا معرفلوش جواب و السؤال التالث لكتير فينا عندو تصور و حتا واحد معندو ليه جواب.
مؤخرا بزاف ديال الأحداث تراكمت على المغريب، ها الأطباء لي gالولهوم نخدموكم عمين أ ضبرو على راسكوم، و الأساتذة المتدربين، ها الصحراء، ها الشغب ها الزلزال …. وزيد عليها
هنا كيبقى السؤال علاش هاد المشاكل مكتوقعش عليهوم ضجة اعلامية بالقدر لي كتوقع على هدوك لي كيشاركو فبرامج الغنى و المواهب لي تgهمنا بيهم.
فاش كتسمع أن الأطباء ملقاوش خدمة هنا كتgول يا سلام لبلاد مبقاتش محتاجة أطباء يا سلام قدرنا نوفرو كمية هائلة و احتياط رائع من الأطباء تا ملقينا فين نخدمو هدو لي بقاو، ولكن الحقيقة المرة قليل فين كنشوفوها، نهار لي كتضطر مرأة من العالم القروي تgطع وديان و مسافات باش تقدرتوصل لسبيطار وتولد، نهار لي كتمشي لطبيب ونتا فعجالة من أمرك ولكن خاسك تسنا حيت الطبيب مكينش و محيت معندهومش الاحتياط، حيت نتا يا مواطن زايد ناقص، نهار لي تلقا السبيطار بحال شي مجزرة دخل الداوى تخرج معقد من دوك المناظر لي تشوفهوم، بنادم مزلع فالأرض بنادم كيغوت يستنا تورتو الدم فالحيط
، شباك ديال السرجم ملسق بالسكوتش مقص مرمي فالأرض .
علاش وخا عارفين هادشي مكنديرو والو؟! علاش؟!
يا سلام الأساتذة مبقالهوم فين اخدمو المدارس عمرو المغرب كولو ولا قاري و واعي مبقاتش الأمية، فجأة تشوف ربورتاج فالعالم القروي ديالنا ويبانلك واحد البيت أ كاتبين فيه مدرسة و يبانولك واحد المجموعة من الوليدات عندهوم رغبة باش اقراو، و تلقا “4 ولا 5” ديال التلاميذ فالمقعد و الركتة ديال بنادم، وواحد الأستاذ مسكين عاد بادي المشوار ديالو فالتدريس جلقاتو الوزارة بعيد على عائلتو وكتلقاه صابر و كيساير تا يفرجها مولانا.
فشنو هو المشكل لي مخلينا هكذا؟! واش منقدروش ناخدو شويا فلوس من داكشي ديال المهرجانات أ نزيدو نبنيو بيهوم المدارس و المصحاات، منها نقدمو خدمة لدوك الناس لي مالقاو فين اتعالجو ولا فين اقراو ومنها دوك ناس لي قراو تا عياو القاو فين اخدمو.
الى كانت أبسط حقوق الإنسان ممتوفرش عليها بنادم فالمغريب كي غادي ادير هاد المواطن ينتج و يقد يعطي لبلاد؟! الا كان الإنسان باش يحصل على فرصتو فالخدمة ولا ولا العلاج ولا… ، ضروري ادخل الرشوة و باك صاحبي كيف غادي اتخلص المغريب من هاد الفساد و الخزعبيلات؟، هنا كنكتاشفو الترابط و التشابك ديال المشاكل لي عيشتها بلادنا، و نتساؤلو شنو هو السبب لي مخلينا كنسايرو الوضع بلا ما نوضعو حد؟! و نتساؤلو شنو هو الحل؟! و نتساؤلو فوقاش غادي نترقاو بالفكر ديالنا و نتخلصو من هاد شي؟! و واش فعلا اقدر اجي شي نهار نحدو من هاد شي؟!
Fin de la conversation
